Gå till innehållet

Kulturbirasbeaivvit

Kulturbirrasiid ávvudat sierra guovlluin Eurohpás - buohkat sáhttet oassálastit sin iežaset vugiideasetguin.

Kulturbirasbeaivvit leat Eurohpá ráđi ja Eurohpá kommišuvnna oktasaš prográmma, masa oassálastet badjel 20 miljovnna olbmo buohkanassii 50 riikkas. Váldodáhpáhusvahkuloahppa lea čakčamánus.

Mii lea dutnje vuohkkaseamos vuohki oassálastit?


Ordne dáhpáhusa 

Dáhpáhus sáhttá leat rabas uvssaid beaivi, oahpisteapmi, čájáhus, bargobádji dahje juoidá áibbas eará! Almmuhathan dáhpáhusat dáhpáhuskaleandarii.

Oassálastte dáhpáhussii 

Kulturbirasbeivviid áigge ordnejuvvojit čuođit dáhpáhusat miehtá Suoma ja duháhat miehtá Eurohpá. Oza alccesat heivvolaš dáhpáhusa kaleandaris ja ávvut kulturbirrasiid!

Ávvut iežat láhkai

Ordne doaluid, vánddar dahje ordne eaktodáhtolaš doaimma ja daga iežat birrasis vel buorebu, gos loaktá!
 

Bajásšaddama báikkit 2020

Min iežas biras fállá máŋggaid vejolašvuođaid oahppamii ja bajásšaddamii. Dieđuid ja dáidduid sáhttá lasihit girjerájuin ja museain, rieggáin ja kurssain dahje dušše beare oahpásmuvvamin lagašbirrasii. Beaiveruovttut, skuvllat ja oahppolágádusat leat dehálaš oahppama ja máhttima báikkit. Bajásšaddama bohciidit maiddái šiljut, luondu ja eatnamat.

Eurohpá kulturbirasbeivviid jagi 2020 temá Bajásšaddama báikkit fállá dáhpáhusordnejeaddjiide buorre vejolašvuođa ovdanbuktit earálágan bajásšaddama ja oahppama birrasiid, dábiid ja muitalusaid.

Buohkat sáhttet ordnet prográmma kulturbirasbeivviide

Gii beare sáhttá ordnet dáhpáhusa kulturbirasbeivviide. Dáhpáhusordnejeaddjái fállojuvvo gulahallandoarjja ja nuvttá materiálat.

Dáhpáhusaid sáhttá ordnet birra jagi

Rabas uvssaid beivviid, bagadallojuvvon tuvrraid, oktasašdoaimmaid, bargobájiid ja máŋggaid eará dáhpáhusaid sáhttá ordnet birra jagi dáhpáhusordnejeaddjiide buoremus áigin.

Jus háliida, dáhpáhusa sáhttá plánet seamma áigái

  • Kulturbirasbeivviid temávahkkuin 7. – 13.9.2020 dahje
  • Riikkaidgasksaš eanadatbeivviin 20.10.2020.

Temávahkku ja eanadatbeaivvi dáhpáhusat leat bures oidnosis váldegottálaš ja eanangottálaš diehtojuohkima bokte.

Skuvllat fárrui

Bajásšaddama báikkit -temá fállá buorre dilálašvuođa doallat kulturbirasbeaivvi skuvllain dahje skuvllaiguin. Sáhtašiigo skuvlla dahje skuvlaluohká bovdet fárrui dáhpáhussii dahje dan plánemii? Sáhtašiigo báikkálaš searveveahka galledit muitaleamen oahppiide iežas skuvllavázzima birra?

Mánáiguin ja nuoraiguin sáhttá plánet maiddái oassálastima Kulturbirrasa dahkkit -gilvui, mii rahpasa čakčat 2020. Gilvvus nuorat birra Eurohpá muitalit máidnasiid iežas kulturárbevierusteaset. Mánát ja nuorat leat kulturbirrasa dehálaš gáhttejeaddjit ja geavaheaddjit dál ja boahttevuođas.

Jahketemá ovttasta ja muitala min oktasaš eurohpalaš árbevierus

Eurohpá kulturbirasbeaivvit, eŋgelasgillii European Heritage Days, dollojuvvojit juohke čavčča 50 riikkas birra Eurohpá duháhiin dáhpáhusain. Temájagit leat oktasačča buot Eurohpá riikkaide ja jagis 2020 oktasaš temá lea Heritage and Education. Birrá Eurohpá buktojuvvo boahtte jagi ovdan kulturárbevieru mearkkašumi oahppama, bajásšaddama ja čuvgehusa gáldun.
 

Kulturbirrasa dahkkit 

Kulturbirrasa dahkkit dahje Heritage Makers lea mánáide ja nuoraide oaivvilduvvon gilvu, mas dutket ja árvvoštallet iežas birrasa ja dan kulturárbevieru. Gilvobargu lea govva dahje video ja govalaš barggu čilgejeaddji oanehaš teaksta. Gilvonbarggut luđejuvvojit www.europeanheritagedays.com neahttasiidui.

Gilvu álgá čakčat 2020

Kulturbirrasa dahkkit gilvu rahppojuvvo čuovvovaš háve čakčat 2020 ja vuoitit bálkkašuvvojit giđđat 2021. Dárkilut dieđut jagi 2020 gilvvus almmuhit dán siiddus maŋimustá loahppagease 2020.

Kulturbirasbeivviid materiálat

Logo

Eurohpa kulturbirasbeivviid prográmmii gullevaš dáhpáhusaid dieđiheamis adnojuvvo beivviid logo.

Sáhtát láddet logoid dás jpg-hámis:

Bajásšaddama báikkit

Fáddájagi 2020 materiálat

 

Oppalaš dieđihančálus

Eurohpa kulturbirasbeivviin lea deaddiluvvon oppalaš dieđihančálus.
Deaddiluvvon dieđihančállosat suomagillii, ruoŧagillii ja davvisámegillii sáhttá diŋgot Suoma Ruovttuguovlulihtus: erp(at)kotiseutuliitto.fi

Bileahtat

Dáhpáhuslágideaddjit sáhttet luoikkahit EHD-diŋgaleavggaid Suoma Ruovttuguovlolihtus. Ilmmut iežat diŋgoma olis boastačujuhusa sihke dilálašvuođa, mas leavga adnojuvvo. Diŋgomat: erp(at)kotiseutuliitto.fi.

Leavggaid sturrodagat:

  • 70 x 150 cm
  • 150 x 200 cm
  • 200 x 300 cm

liput

Áibmospáppat

Diŋgo iežat dilálašvuođa čiŋaheami várás áibmospáppaid Eurohpa kulturbirasbeivviid logoin. Vai spáppat leat buohkaide doarvái, de sáhttit sáddet eanemusat 50 st dáhpáhuslágideaddji guovdu. Diŋgomat: erp(at)kotiseutuliitto.fi.

pieni_pallonpitäjä

Eanadagaid jahkásaš ávvobeaivi 20.10.

Riikkaidgaskasaš eanadatbeaivi dollojuvvo juohke jagi 20.10. Beaivi laktása eurohpalaš eanadatoppalašsoahpamuššii, man ulbmilin lea dikšut ja suodjalit buotlágan eanadagaid.

Kulturbirasbeivviid dáhpáhusat maiddái eanadatbeaivve

Jagis 2019 Riikkaidgaskasaš eanadatbeaivvi lea dollojuvvon oassin Eurohpá kulturbirasbeivviid prográmma. Kulturbirasbeivviid dáhpáhusordnejeaddjit sáhttet plánet eanadahkii laktáseaddji álbmotdáhpáhusaideaset golggotmánu 20. beaivái jus háliidit.

Govve ja juoge du #árgaeanadaga

Eanadatbeaivvi sáhttá doallat maiddái okto ovdamearkka dihtii meahcis johtimin ja govvemin earálágan eanadagaid. Eanadatgovaid sáhttá juohkit Instagramas birra jagi fáddagilkoriin #árgaeanadat. Eanadatbeaivin lea árbevirolaččat ordnejuvvon govvengilvu, mas buoremus 20.10 juhkkojuvvon #árgaeanadat-govat leat bálkkašuvvon girjebálkkašumiiguin.

Eanadatbeaivvi koordinerejit birasministeriija ja Suoma birasguovddáš.

Lassedieđut: Kansainvälinen maisemapäivä (ymparisto.fi)

Publicerad 26.7.2018 kl. 13.28, uppdaterad 27.7.2020 kl. 11.50